Untitled Document

活水基金Facebook

普通話「金錢以外」
「金錢以外」《平衡生活　豐盛人生》
「金錢以外」電台節目  
《平衡生活　豐盛人生》　講者：聖神內更新團體　|　第二十五集：平衡你的個人生活（一）
請等候片刻...
 

如遇問題，請按聯絡我們，讓我們盡快跟進。

J：各位朋友你地好，我係聖神內更新團體嘅Joseph。


E：我係Elizabeth，大家好。


J：呢個星期，我地會同大家講一個主題，叫做「平衡你的個人生活」。


E：平衡對於我地好重要架，就算你幾成功，搵到好多錢，但如果你生命唔平衡，會有好多問題產生。天主想我們嘅個人生活亦要取到平衡。聖經智慧篇8章1節描述天主治理萬物嘅奧妙：「智慧施展威力，從地極直達地極，從容治理萬物。」天主要一切事物都處於均衡和平嘅狀態。


J：自然界的原則是：世界係要處於一個完美嘅平衡狀態。生態學家發現食物鏈裡面嘅生物數目唔平衡嘅話，咁成個生態系統都會受影響。例如：草原上嘅野兔被人屠殺之後，豺狼因為無兔仔食而餓死，野草因為生長得太茂密，唔夠養料同陽光而枯萎。


E：講到平衡，我就想起建築啦。係起一座大廈嘅時候，工程師要確保建築物係按準則興建，如果地基有問題，建築物各點所受的壓力唔平衡嘅話，幢建築物就會倒塌架啦。


J：平衡亦令我聯想到我地嘅身體，我地要保持健康都係一樣要平衡喎。當我地有病嘅時候，身體會處於一個唔平衡嘅狀態。我地嘅紅血球同白血球嘅數目同平時唔同，即係失平衡。但係當我地嘅身體恢復平衡時，我地就會康復過來。


E：現代都市人最普遍嘅問題就係生活失去平衡。好似睡眠失去平衡，即係唔夠瞓，成日要捱夜，又或者瞓得唔好都係失去平衡。


J：都市人又好容易飲食失衡，有時暴飲暴食，有時又忙到唔得閒食，餓到胃痛。


E：我覺得工作失衡都幾普遍喎，工作時間過長啦，甚至成日要開通宵。不過唔係淨係工作先至會捱通宵，玩都會，即係玩樂失衡啦。打機打通宵唔瞓，都係時下青年都幾common。


J：其實任何方面都可以失去平衡。問題係，我地大部份人傾向只著重改善我地比人見得到嘅野，好似我們的外表、儀容同埋談吐，但係我地嘅個人生活習慣，因為無人睇到，又唔多要向人負責，就由得佢一塌糊塗。


E：可惜嘅係，當我地個人嘅生活唔平衡的話，就會出現問題：我地會好累，同埋會覺得沮喪


J：Elizabeth呀，我曾經見過嘅一種中國雜技表演，用來反映生活失平衡都幾貼切。有一次，我睇人表演用竹枝轉碟，佢身手好好，可以一次過用九枝竹竿同時轉九隻碟。最困難就係當轉好第九隻碟時，第一隻碟開始轉得好慢，就黎跌，佢要係碟未跌之前走去轉翻起佢，所以佢嘅表演就係走來走去轉完一隻又翻轉頭轉第二隻，又再轉第三隻，佢係好身手，不過就忙到不得了。


E：好多人嘅嘅生活就係咁。樣樣都關佢事，未忙完一樣，第二樣又嚟啦。忙到不得了，好多時候一件事未攪好，另一件事就開始脫軌，令人好沮喪。


J：當我地嘅生活失去平衡嘅時，我地就會覺得好累，就好似汽車嘅四條呔充氣氣壓都唔一樣，部車行嘅時候唔順暢，有條呔一定磨損得比較厲害，好易爆呔。


E：係呀!人都係一樣，好易爆，所以唔去搞到失哂平衡都唔理呀。


J：今晚時間夠啦，聽晚再傾啦，再見。


E：再見。
  返回目錄