 |
||||
|
||||
| 請等候片刻... | ||||
如遇問題，請按聯絡我們，讓我們盡快跟進。 |
||||
 |
||||
M=May S=Stella J=Jane 第四晚 S：各位朋友你好，我係聖神內更新團體嘅Stella。 M& J: 我係 Ah May，大家好，[我係 Ah Jane，大家好。] S：Ah May, 你屋企有冇磅？ M：有, 我仲要每朝都磅吓先至安樂添。 J：我睇你都好fit呀, 點解你會日日磅住呀？ M：如果唔 check 住, 好容易肥咗都唔知。但我先生就剛剛相反, 唔鐘意磅, 肥咗都唔知。依家佢已經超哂重，醫生仲要佢減肥添。 S：阿May, 你知唔知, 你同你先生係屬於兩種唔同類型嘅人: 你屬於第一類，即使冇咁嘅需要，都會時時 check 住, 好想知道真相。另一類就似你先生，對事實愛理不理，可能仲有啲抗拒、逃避嘅成份，而因為無特別留意，情況可能已經惡化，自己都唔知道。 J：每個人其實都需要求真，鏡同磅嘅出現都係幫我地認識自己真實嘅一面。同樣我哋都需要有人對我哋講真心話，指出自己嘅盲点、弱處。當我哋做嘅嘢偏離正軌時，都需要有人提醒，乜嘢係正確嘅價值觀。 M：但唔係人人都可以接受「真相」個噃, 好似我先生咁。我哋可以点做呢？ S：聖經箴言16:21話:「溫和的口吻，更具說服力」。暴躁時講嘅話，好難說服別人，亦會令人抗拒，仲可能令人怕咗你，或者敷衍住你，其實就陽奉陰違。 J：係呀！相反，語氣越溫和，你講嘅話就越有說服力。用最正面嘅態度講話嘅人，就係最有說服力嘅人。 M：「最正面嘅態度」? 即係点呀？ S：嗱, 除咗語氣要温和外, 你勸人嗰陣, 仲要表現出成熟, 同諒解, 咁就係「最正面嘅態度」啦！ M：但我見依家社會上嘅人，話人嗰陣都好挑剔，好批判同埋攻擊，仲會將人標籤、扣人帽子，咁係唔係唔啱? J：梗係唔好啦！批評好容易，唔需要好叻都可以做得到。但係呢啲人身攻擊呀、誹謗嘅做法，都唔会得到理想嘅效果。你睇吓依家社會少咗一份和諧, 就係咁解。 M：咁，用温和嘅語氣、成熟、同諒解嘅態度，又点樣幫倒我哋解决問題呢？ S：聖經教我地用溫和的態度，你可以試吓用以下三個步驟。第一,將真相、同問題，用温和嘅語氣講出嚟。第二、就要表明你希望尋求解決問題嘅辦法。最後，就係提出一啲有建設性的解決辦法，比人考慮、同討論。 M：唔。先用正面嘅態度講出真相同問題, 然後積極尋求解決方法。態度同語氣都需要温和，咁我哋講嘅說話就会有說服力。好！我就用呢個方法勸我先生減肥。 J：不過阿May，你要記住每個人都有優点同缺点。舉例有個人,有七成嘅地方你係欣賞佢嘅，但有三成你係唔喜歡，甚至激到個你死嘅—我哋就要愛佢嘅優点，同時包容佢嘅缺点。 S：係呀，我地要記住，我地都有我地嘅 「三成」唔完美嘅地方要人哋包容自己。 M：係嘅，人又点会十全十美唉！ 現實生活冇乜嘢係理所當然、亦冇十足十完美嘅人際關係。不過作為基督徒，我有多一份把握、同信心，因為，聖經有句話:「我賴加强我力量的那位，能應付一切。」所以我知道只要靠天主嘅幫助、問題都可以迎刃而解。 S：願天主祝福大家，聽日再見！ J&M: 再見！ |
||||
 |
||||
|
||||
網頁比例
訂閱頻道
活水福傳新呈獻