 |
||||
|
||||
| 請等候片刻... | ||||
如遇問題，請按聯絡我們，讓我們盡快跟進。 |
||||
 |
||||
Flora：各位你哋好！我係更新團體嘅Flora！ Matthew：我係Matthew。 Flora：點呀老公！今日星期三喇噃，講咗四集點樣「返工唔係捱」，你今日返工感覺點呀！ Matthew：講咗4日工作嘅價值，雖然工作嘅人同環境都無變，但係自己覺得工作多咗意義，有啲使命感，的確感覺良好咗噃！再加上今晚我返咗更新團體嘅小組，可以同一班弟兄姊妹傾吓，大家一齊變，有人一齊行，所以個人都開心啲 Flora：好喇噃，今日係最後一日講工作，聖經講工作仲有邊個目的呀？ Matthew：工作使我哋有尊嚴。教宗若望保祿二世講到貧窮國家和失業問題時亦都強調：「工作帶俾人尊嚴」。無論大家做咩工作，總之是合法和誠實嘅工作，都會使你有尊嚴，因為天主已經將一啲心靈上同精神上嘅回報放咗喺工作度，而只有透過工作，先會幫你得到呢啲回報。呢啲回報就係一份成就感，一種任務已經完滿完成嘅感覺。呢份心裡面嘅滿足感，使你知道，你已經盡心盡力做好你要做嘅嘢 Flora：大家唔知有無試過俾人讚你嘅工作做得好呢？如果有嘅話，你一定會更加感受到呢份滿足。如果大家已經盡力，做得好都無人讚，你可以自己讚吓自己，又或者諗吓天主吖！佢讚緊你架！ Matthew：老婆呀，我諗起聖經裡面，聖保祿嘅說話，喺弟茂德後書4章7節，佢知道自己就快要被人處死，喺人生最後階段，佢話：「這場好仗，我已打完；這場賽跑，我已跑到終點」，保祿係話佢已經盡力做好佢要做嘅事，我感受到佢嗰份滿足感同嗰份溫暖嘅感覺 Flora：事實上，當人為一啲有價值同有意義嘅嘢去奮鬥嘅時候，是人最快樂嘅時候。將來返到伊甸樂園，天主亦會要人喺樂園度工作。伊甸樂園唔係一個無止境歇息同休閒嘅地方，即使喺裡面都要做嘢，不過我相信會做得好開心唧 Matthew：其實喺世上最可憐同最悶嘅人，就係啲無所事事，唔願意工作嘅人，佢哋表面上好以好快活，其實佢哋悶到要死，人生無方向嘅感覺先係最難捱。無嘢做嘅人，都容易啲抑鬱 Flora：係呀！天主話，工作帶俾人心靈同精神上嘅好處，使你嘅生命有尊嚴。 Matthew：大家唔知有無留意到，我哋講過嘅六個工作目的中，都無提工作會使你變成有錢人，點解呢？因為無論你賺到幾多錢，如果你嘅工作只是浪費緊你嘅生命，或者你做緊一啲無意義嘅事，咁無論你人工幾高，你都係蝕底，因為其實你每日都將你嘅生命投資落份工度，所以唔好浪費你百份之四十嘅時間，要喺你嘅工作中活意義 Flora：無錯，喺第一集，我講過我打過唔同嘅工，而天主都透過每份工講俾我聽唔同嘅嘢。第一份工，我喺測量師行度做，賺到都幾多錢，但係只係令我亂使錢，最後仲反欠銀行錢，呢份工教識我要善用金錢；第二份工喺一間製衣嘅buying office返工，我認識到一啲唔係好有錢，但好愛惜自己家人、老婆、仔女嘅人，我以前感情受過傷，天主通過呢份工，使我重拾對家庭、對男性嘅信心，我先有今日咁好嘅老公咋；第三份工，喺發展商度做，雖然好忙，但真係可以俾到我好大嘅滿足感，俾我知道，我係一個有能力嘅人；跟住係電訊公司嘅嗰份工，無咁忙，天主就通過我使兩位同事，同佢哋一家人信咗主；最後一份係教會團體嘅工作，天主磨練我，使我改變遲到同唔好脾氣嘅壞習慣。通過咁多份工，我依家變得好開心、自由。大家呢，你喺而家同以前嘅工作，又學到啲咩好嘢呢！ Matthew：天主一早就設計咗大家要工作，工作除咗你份人工，仲鍛鍊你嘅品格、使你可以養自己，照顧家人，可以慷慨，通過工作，你可以做其他人嘅好榜樣，使呢個世界變得更好，仲使你過有尊嚴嘅生活 Flora：好喇！工作就暫時講到呢度，過一個禮拜，另外兩位兄弟姊妹Simon同Pinky會教你點樣做嘢做得Sharp醒啲 Matthew：由聽日開始，我哋一連5集，會好健康咁講吓同「性」有關嘅內容 M/F：聽日再見！拜拜！ |
||||
 |
||||
|
||||
網頁比例
訂閱頻道
活水福傳新呈獻